Hãy nhìn lại cuộc sống của bạn.

Zaj tshoob Txais Kaus by Tshaj Meej

1 75

Zaj tshoob Txais Kaus yog ib zaj keeb kwm los ntawm peb hmoob kev ua tshoob ua kos. Xis li thaum lawv hais zaj Cob Kaus tuaj tag lawm no ces koj yuav tsum hais zaj no. Zaj Txais Kaus yog zoo li hauv qab no.

Koj xav paub zaj Taij Kaus ntawm no Zaj tshoob Taij Kaus by Tshaj Meej

Nqe 1:

Hais zoo li kus! Chiv phiaj tuaj yuas kuv niam kuv txiv. Xyoo no kuv niam kuv txiv neb tus plaj tshoob li ntaug los poob. Kuv niam kuv txiv neb tsuas yuav muab tau neb lub kaus vej kaus vuam rau wb txiv tuam mej koob lwm mej koob coj mus ua neb tus puav pheej tshoob.

Xyoo no kuv niam kuv txiv neb tus plaj kos li ntsig los txog. Kuv niam kuv txiv neb tsuas yuav muab tau neb lub kaus vej kaus vuam rau wb txiv tuam mej koob lwm mej koob coj mus ua neb tus puav pheej kos.

Nqe 2:

Hais zoo li kus!  Kuv niam kuv txiv neb muab tau niam nkauj kaug coj los cob lis nkaus rau wb txiv tuam mej koob lwm mej koob tej mus quav npab. Lag yau wb li zoo yeej cuam nkauj nyab nraug vauv mus nce kab.

Kuv niam kuv txiv neb muab tau niam nkauj kaug coj los cob lis nkaus rau wb txiv tuam mej koob lwm mej koob tej mus quav tes. Lag yau wb li zoo yeej cuam nkauj nyab nraug vauv mus nce kev.

Nqe 3:

Hais zoo li kus!  Lag yau wb yuav roos nkauj nyab nraug vauv mus txog toj taim tom tim ub. Tshav tuaj ces tshav kub, nag los ces nag ntub. Kuv niam kuv txiv neb niam nkauj kaus ces wb yuav tsis muab nthuav los mus roos hnub.

Lag yau wb yuav roos nkauj nyab nraug vauv mus txog toj taim tom tim i. Tshav tuaj ces tshav ci, nag los ces nag tshi lis si. Kuv niam kuv txiv neb niam nkauj kaus ces wb yuav tsis muab nthuav los mus roos hli.

Nqe 4:

Hais zoo li kus!  Lag yau wb muab kuv niam kuv txiv neb txoj kab tshoob leg mus kom ntseg, kev kos leg mus kom tiav. Lag yau wb noj nqaij mus puv plab, haus cawv mus puv cev, ces lag yau wb li yeej cuam niam nkauj kaug roos nkauj nyab nraug vauv rov los fib tse.

Lag yau wb muab kuv niam kuv txiv neb txoj kab tshoob leg mus kom ntseg, kev kos leg mus kom tiav. Lag yau wb haus cawv mus puv cev, noj nqaij mus puv plab, ces lag yau wb li yeej cuam niam nkauj kaug roos nkauj nyab nraug vauv rov los fib qab.

Nqe 5:

Hais zoo li kus!   Lag yau wb yuav muab niam nkauj kaug roos nkauj nyab nraug vauv los txog kuv niam kuv txiv neb tej qab mus tsev thim. Ntshe kuv niam kuv txiv neb tub tij nyob mus tsib lij, tub lwm nyob mus tsib xwm, yuav nrog tau kuv niam kuv txiv neb tus nkauj hwb dab roog luag lis nyav los nrog lag yau wb qhib.

Lag yau wb yuav muab niam nkauj kaug roos nkauj nyab nraug vauv los txog kuv niam kuv txiv neb tej qab mus tsev vuas. Ntshe kuv niam kuv txiv neb tub tij nyob mus tsib lij, tub lwm nyob mus tsib xwm, yuav nrog tau kuv niam kuv txiv neb tus nkauj hwb dab roog luag lis nyav los nrog lag yau wb xyuas, no tis yuas kuv niam kuv txiv e!

Zaj tshoob Txais Kaus los xaus li no. Zoo siab tau piav rau ib tsoom paub thiab kawm. Koj mam kho kom raws siab nyiam.

Koj xav saib Zaj Tshoob Tsim Rooj Full video Zoo mloog

Để lại bình luận

Địa chỉ email của bạn sẽ không được công bố.

Website này sử dụng Akismet để hạn chế spam. Tìm hiểu bình luận của bạn được duyệt như thế nào.