Hãy nhìn lại cuộc sống của bạn.

Zaj tshoob Cob Qaib Npws Poj by Tshaj Meej

2 12

Zaj tshoob cob Qaib Npws Poj no muaj 11 nqe nawb. Xis li pos ua tseg yawm ua cia, kev ua tshoob ua kos yuav tsum hais txog zaj tshoob. Yog tsis muaj zaj tshoob ces ntshe txhua yam yuav tsis thoob li nawb mog.

Nqe 1:

Hais zoo li kus! Chiv phiaj tuaj lawm yuas neb nkawm phooj ywg kwv sis luag. Lag yau wb nyob wb cuaj hnub kev deb kev sis zus, kuv niam kuv txiv tom ub li tuaj thov lag yau wb lub zog txus.

Lag yau wb nyob wb cuaj hnub kev deb kev sis zas, kuv niam kuv txiv tom ub li tuaj thov lag yau wb lub zog tas.

Nqe 2:

Lag yau wb xav tias wb tsis tuaj los ua neej nyob muaj tub yuav muab nyab, muaj ntxhais los yuav quas lag yau wb li tuaj.

Lag yau wb xav tias wb tsis leg los ua neej nyob muaj tub yuav muab nyab, muaj ntxhais los yuav quas lag yau wb li leg.

Nqe 3:

 Lag yau wb tuaj txog lis ntua kuv niam kuv txiv tom ub rooj tag qab mus plaj txuas, kuv niam kuv txiv tawm lis plaws tuaj hu lag yau wb luag lis nqhuas.

Lag yau wb tuaj txog lis ntua kuv niam kuv txiv tom ub rooj tag qab mus plaj xab, kuv niam kuv txiv tawm lis plaws tuaj hu lag yau wb luag lis nyav.

Nqe 4:

Kuv niam zoo siab kuv niam sawv lis tsees los tua tsiaj, ua xwm phaj rau lag yau wb noj. Kuv niam kuv txiv tso lis plhuav nws txoj kab tshoob rau lag yau wb coj.

Kuv txiv zoo plawv kuv txiv sawv lis tsees los txo cawv, ua xwm tshuaj rau lag yau wb haus. Kuv niam kuv txiv tso lis plhuav nws txoj kev kos rau lag yau wb taug.

Nqe 5:

Lag yau wb noj tag wb yuav rawm tuaj, kuv niam kuv txiv tom ub lam tau mus lam zuaj, zuaj tau puj qaib tub cuas luam mus npauj cub luaj.

Lag yau wb noj tag wb yuav rawm los, kuv niam kuv txiv tom ub lam zuaj mus lam tau, zuaj tau puj qaib tub cuas luam mus npauj cub tshau.

Nqe 6:

Lag yau wb nquam lis yeev tuaj txog nram roob. Lag yau wb muab saib ces plaub ces yog plaub qaib, cev yiag lis qaim xws cev coob.

Lag yau wb nquam lis yeev tuaj txog nram tsua. Lag yau wb muab saib ces plaub ces yog plaub qaib, cev yiag lis qaim xws cev ncuas.

Nqe 7:

Lag yau wb nquam lis yeev tuaj txog nram dej. Luag noj sus luag tsis laig dab. Lag yau wb noj sus wb yuav laig dab. Wb de lis nrho lawm niaj ib qho los laig dab, laig lawm ib dia rau tus xeeb hauv dej tsis pub kom luj hlw nees los tav lag yau wb tej hau ntej.

Lag yau wb nquam lis yeev tuaj txog nram hav. Luag noj sus luag tsis laig dab. Lag yau wb noj sus wb yuav laig dab. Wb de lis nrho lawm niaj ib qho los laig dab, laig lawm ib dia rau tus xeeb hauv hav tsis pub kom luj hlw nees los tav lag yau wb tej hau kab.

Nqe 8:

Lag yau wb nquam lis yeev tuaj txog kuv niam kuv txiv tsev tom no. Lag yau wb tsis pom qab cob. Tub tsheej mus luj vim luj vim ua neb nkawm phooj ywg kwv sis luag tsaug. Lag yau wb muab cob lis nkaus rau neb txiv tuam mej koob lwm mej zeeg. Yuav kom zoo saib ces tsis zoo saib, lag yau neb pab wb muab coj mus khaws dai.

Lag yau wb nquam lis yeev tuaj txog kuv niam kuv txiv tsev tom no. Lag yau wb tsis pom qab cob. Tub tsheej mus luj vim luj vim ua neb nkawm phooj ywg kwv sis luag tsaug. Lag yau wb muab cob lis nkaus rau neb txiv tuam mej koob lwm mej zeeg. Yuav kom zoo nuam ces tsis zoo nuam, lag yau neb pab wb muab coj mus khaws khuam.

Nqe 9:

Lag yau neb pab coj mus khaws dai lis nkaus rau kuv niam kuv txiv tom no tus ntiv nthab, kom peb txhij cuab sawv daws sib cog saib. Tsam kuv niam kuv txiv tom no lub plaj tsev muaj niaj ciab mus ua tsiv siab, ciab cais mus ua tsiv plawv, ntsim lis npawv lawm niaj ib tsawg qab. Nej yuav kom lag yau wb pauj los wb pauj tsis nyog, kom lag yau wb ntxiv los wb tsis muaj qas tsi ntxiv. Ntshe kaj ntug tag kis lag yau wb lub ntsej muag ntshaus lis ntshov tsis zoo rov mus fib qab.

Lag yau neb pab coj mus khaws dai lis nkaus rau kuv niam kuv txiv tom no tus ntiv ncej, kom peb txhij cuab sawv daws sib cog xyuas. Tsam kuv niam kuv txiv tom no lub plaj tsev muaj niaj ciab mus ua tsiv siab, ciab cais mus ua tsiv plawv, ntsim lis npawv lawm niaj ib tsawg tes. Nej yuav kom lag yau wb pauj los wb pauj tsis nyog, kom lag yau wb ntxiv los wb tsis muaj qas tsi ntxiv. Ntshe kaj ntug tag kis lag yau wb lub ntsej muag ntshaus lis ntshov tsis zoo rov mus fib tse.

Nqe 10:

Tub tsheej mus luj vim luj vim mus ua neb nkawm nus tij kus nus kwv tsaug. Neb nkawm nus tij kus nus kwv coj mus ntxus tawv tsis ntxus to, ntxus tawv to tuaj saum cam. Daus lis voom rau lub yias hlau, ncej yias ces muab taws rau, qaum yias npau lis auv. Daus sis voom rau lub tais xyoob coj mus cob lis nkaus rau kuv niam kuv txim tom no. Kuv niam kuv txiv tes lauj taws tswm ciab, lauj nas taws tswm thuv los hua lis hawv rau nws peb txhis poj yawm los txwv txoob.

Tub tsheej mus luj vim luj vim mus ua neb nkawm nus tij kus nus kwv tsaug. Neb nkawm nus tij kus nus kwv coj mus ntxus tawv tsis ntxus to, ntxus tawv to tuaj saum cam. Daus lis voom rau lub yias xyoob, ncej yias ces muab taws ncooj, qaum yias npau lis vooj. Daus sis voom rau lub tais ntseej coj mus cob lis nkaus rau kuv niam kuv txim tom no. Kuv niam kuv txiv tes lauj taws tswm ciab, lauj nas taws tswm thuv los hua lis hawv rau nws peb txhis poj yawm los txwv zeej.

Nqe 11:

Kuv niam kuv txiv tsuas txawj npws mus txawj laig, nws yuav laig mus txij caug. Kuv niam kuv txiv tom no peb txhis poj yawm li tau noj txhij mus haus tsau.

Kuv niam kuv txiv tsuas txawj npws mus txawj laig, nws yuav laig mus txij dua. Kuv niam kuv txiv tom no peb txhis poj yawm li tau noj txhij mus haus txhua, no tis yuas neb nkawm phooj ywg kwv sis luag e!

Zaj Cob Qaib Npws Poj los xaus li no. Ib sab teb ib tsa txuj, yog li yuav muaj ib qho txawv los koj mam muab kho kom haum siab. Ua tsaug ntau.

Koj xav kawm ntxiv Zaj tshoob Txais Qaib Npws Poj by Txum Meej

Để lại bình luận

Địa chỉ email của bạn sẽ không được công bố.

Website này sử dụng Akismet để hạn chế spam. Tìm hiểu bình luận của bạn được duyệt như thế nào.